Калачык Уладзімір Міхайлавіч нарадзіўся 24 ліпеня1930 года ў вёсцы Мароські Маладзечанскага раёна Мінскай вобласці ў сям’і бедных сялян. З 1937 да 1944 г. вучыўся спачатку ў Мароськаўскай пачатковай школе, затым у Лебедзеўскай сярэдняй школе. У 13-гадовым узросце Уладзімір Міхайлавіч застаўся без маці, ў 18 гадоў не стала ў яго і бацькі. З 1948 года юнак стаў старэйшым у сям’і, замяніў бацькоў двум малодшым братам і сястры.
З 1944 да 1950 года Уладзімір Міхайлавіч працаваў на ўласнай гаспадарцы, займаўся земляробствам.
У 1950 г. ён уступіў у калгас імя Варашылава. Спачатку працаваў радавым калгаснікам, затым улікоўшчыкам, брыгадзірам паляводчай брыгады. У 1951 годзе Калачык У. М. быў накіраваны калгасам на вучобу ў Гродзенскую сярэднюю сельскагаспадарчую школу па падрыхтоўцы старшынь калгасаў. Адзін год ён вучыўся ў г. Ашмяны і 2 гады – у г. Гродна.
Пасля заканчэння ў 1954 годзе Гродзенскай сельскагаспадарчай школы па падрыхтоўцы старшынь калгасаў быў прызначаны намеснікам старшыні калгаса імя Варашылава ў вёсцы Мароські Маладзечанскага раёна Мінскай вобласці.
У 1955 годзе Уладзімір Міхайлавіч быў выбраны першым сакратаром Маладзечанскага раённага камітэта Ленінскага Камуністычнага Саюза Моладзі Беларусі. З верасня 1955 года – член Камуністычнай партыі Савецкага Саюза.
У маі 1957 года бюро РК ЛКСМБ рэкамендавала Калачыка У. М. старшынёй тады яшчэ слабога калгаса “Светлы шлях” Маладзечанскага раёна Мінскай вобласці.
Працуючы на пасадзе старшыні калгаса, Уладзімір Міхайлавіч займаўся ўдасканаленнем калгаснай вытворчасці.
У 1963 годзе ён скончыў Беларускую ордэна Працоўнага Чырвонага Сцяга сельскагаспадарчую акадэмію ў г. Горкі Магілёўскай вобласці па спецыяльнасці “Эканоміка і арганізацыя сельскай гаспадаркі”, пасля чаго яму была прысвоена кваліфікацыя “вучоны аграном-эканаміст”.
З’яўляючыся дэпутатам Вярхоўнага Савета БССР (8 скліканне, 1971 г.), Калачык У. М. быў выбраны намеснікам старшыні Вярхоўнага Савета БССР.
Указам Прэзідыума Вярхоўнага Савета СССР ад 30 красавіка1966 г. Калачыку Уладзіміру Міхайлавічу прысвоена званне Героя Сацыялістычнай працы з уручэннем ордэна Леніна і залатога медаля “Серп і молат”.
У 1969 годзе на з’ездзе калгаснікаў Калачык У. М. быў абраны членам Савета і членам Прэзідыума Саюзнага Савета калгаснікаў. Неаднаразова выбіраўся дэпутатам абласнога, раённага і сельскага Саветаў.
У 1974 годзе Уладзімір Міхайлавіч бліскуча абараніў навуковую працу на атрыманне вучонай ступені кандыдата эканамічных навук па тэме: “Павышэнне эфектыўнасці выкарыстання зямлі ў калгасах паўночна-заходніх раёнаў БССР” (на матэрыялах Валожынскага і Маладзечанскага раёнаў).
Калачык Уладзімір Міхайлавіч быў старшынёй калгаса “Светлы шлях” да лютага 1988 года. За час яго кіраўніцтва гаспадаркай некалі слабы калгас “Светлы шлях” стаў адным з лепшых.
У калгасе “Светлы шлях” вывучалася практыка іншых перадавых калектываў і асобных майстроў.
Калгас добра супрацоўнічаў з шэрагам навуковых устаноў рэспублікі, з вопытнымі станцыямі, з Маладзечанскім гатункавым участкам і нават з асобнымі замежнымі навуковымі ўстановамі.
На палях гаспадаркі быў выведзены новы гатунак жыта - “Белта”, якому даў пуцёўку ў жыццё вядомы беларускі селекцыянер – прафесар Н. Д. Мухін. Сюды прыязджалі лепшыя селекцыянеры гатункаў бульбы П. І. Альсмік, Н. Д. Дарожкін і іншыя. Калгас “Светлы шлях” меў сваё эксперыментальнае поле, на якім у вытворчых умовах выпрабоўваліся новыя гатункі, праводзіліся вопыты з угнаеннямі, тэрмінамі сяўбы, нормамі высева і спосабамі апрацоўкі глебы. Найлепшыя гатункі раяніраваліся, выкарыстоўваліся для распаўсюджання іншымі гаспадаркамі.
За поспехі ў развіцці сельскагаспадарчай вытворчасці, дасягнутыя ў 9-ай пяцігодцы, калгас “Светлы шлях” быў узнагароджаны ордэнам Працоўнага Чырвонага Сцяга.
За дасягненне найвышэйшых паказчыкаў па выніках Усесаюзнага сацыялістычнага спаборніцтва за 1983 год і 11-ю пяцігодку калгас быў узнагароджаны пераходным Чырвоным Сцягам Цэнтральнага Камітэта КПСС, Савета Міністраў СССР, Усесаюзнага Цэнтральнага Савета Прафесійных Саюзаў (ВЦСПС) і ЦК ВЛКСМ.
За перыяд з 1957 да 1988 гг. 60 членаў калгаса былі ўзнагароджаны ордэнамі і медалямі, 96 – медалямі Выставы Дасягненняў Народнай Гаспадаркі (ВДНГ) СССР.
Моцная эканамічная аснова калгаса “Светлы шлях” дала магчымасць выдзяляць значныя сродкі на сацыяльнае развіццё гаспадаркі. У калгасе добра развівалася гаспадарчае і культурна-бытавое будаўніцтва, добраўпарадкаванне населеных пунктаў.
Калгас “Светлы шлях” і Калачык Уладзімір Міхайлавіч былі вядомы не толькі ў Беларусі, але і за мяжой.
У 1962, 1989 гадах Калачык У. М. выбіраўся дэпутатам Вярхоўнага Савета СССР, двойчы – дэпутатам Вярхоўнага Савета БССР, з’яўляўся членам абласнога і раённага камітэтаў Камуністычнай партыі Беларусі.
У 1988 - 1990 гг. Уладзімір Міхайлавіч працаваў генеральным дырэктарам агракамбіната “Маладзечанскі” (г. Маладзечна Мінскай вобласці).
З сакавіка 1990 да 1993 года быў выбраны намеснікам старшыні Маладзечанскага раённага Савета народных дэпутатаў. А з сакавіка 1993 года працаваў намеснікам старшыні калгаса “Светлы шлях”. Знаходзіўся на гэтай пасадзе да лістапада 1995 года.
15 мая 2000 года Калачыку Уладзіміру Міхайлавічу прысвоена званне “Ганаровы грамадзянін Маладзечанскага раёна” пад нумарам 1.
Калачык Уладзімір Міхайлавіч напісаў 5 навуковых прац. Ён некалькі разоў наведваў краіны: Канаду, ФРГ, Аўстрыю, Манголію, Польшчу і іншыя.
За вялікі асабісты ўклад у развіццё сельскагаспадарчай вытворчасці Калачык У. М. узнагароджаны ордэнам Кастрычніцкай рэвалюцыі, 2 ордэнамі Леніна, ордэнам Працоўнага Чырвонага Сцяга і ордэнам Дружбы народаў, медалём “За доблестный труд”; у гонар 100-годдзя з дня нараджэння У. І. Леніна – Ганаровымі граматамі Вярхоўнага Савета СССР, БССР і іншымі ўзнагародамі.
Дзякуючы яго намаганням, былі пабудаваны храмы ў вёсках Мароські і Заскавічы, адрамантаваны храм у вёсцы Беніца.
Калачык Уладзімір Міхайлавіч – Герой Сацыялістычнай працы, дэпутат Вярхоўнага Савета Саюза Савецкіх Сацыялістычных Рэспублік (СССР), Дэпутат Вярхоўнага Савета Беларускай Савецкай Сацыялістычнай Рэспублікі (БССР), член Цэнтральнага Камітэта Камуністычнай партыі Беларусі (ЦК КПБ), кандыдат эканамічных навук, вучоны аграном-эканаміст, Ганаровы грамадзянін Маладзечанскага раёна.
свернуть